جابك الله من فـراق ضيـق صـدور المبانـي
قبل لا الوحشه تزعزع بيتك الصلـب وتبيـده
بيتك اللي من رحلـت وكـل جدرانـه تعانـي
ماتحمـل ينتظـر شهريـن وعيونـك بعيـده
الله العالـم لـو انـك جيـت متأخـر ثوانـي
ماتشوف إلا بقايا مـن حصـاه ومـن حديـده
من عرفتك وانت ضايع من مواني لي موانـي
وتارك قلبي يولـع مـن وقيـده لـي وقيـده
ضاع عمري بس أحـد بهالليالـي واتحدانـي
وانت لا تشبع غياب ولا تخـاف مـن النقيـده
ودي أتحمد لك الله بالسلامـة ... مـا مدانـي
كل ماتوصـل برحلـه ترجـع برحلـه جديـده
دام تدري كـل وجـه غيـر وجـه الله فانـي
يا خي اكسب لك ثواب وخاف ربك في عبيـده
كان فيني عيب قلي ... فيني العيـب الفلانـي
كان هرجي مزعلك في شـي قلـي : لاتعيـده
لعنبوك ان مت بيدك وش يفكك من خوانـي ؟!
لـاحزنوا ربعي علي ومت ... شاللي تستفيده ؟
ليه تصغر في عيوني وانـت برقـاب الغوانـي
عيب تستسهل طعوني وانـت خابرنـي وليـده
انت منت اللي عشقته !! انت اكيد انسان ثاني
كيف صرت بهالبـرود وهالأحاسيـس البليـده
وين حبك للزعل ... وين العنـاد الأولانـي ؟
وين حنية زمـان وفرحـة العمـر الرغيـده ؟
وين ذاك اللي ليـا أقبـل مايبـات الا بأمانـي
وين رايح اللي ليـا قفـا مايـروح الا فقيـده
واحـد جابـه الله بـس يـامـر ويعصـانـي
الوحيد اللي أخافه غصب وامشي معه "سيـده"
مابغيـت اطيـح بيـده ليـن ماربـي بلانـي
والا انا لو هي بكيفي ... مابغيت اطيـح بيـده
ذاك بس اللي ليا مـن شفتـه يلخبـط كيانـي
ذاك من نظرة ينشـف دم قلبـي مـن وريـده
قبل اشوفه أجمع إله أحلى القصايـد والمعانـي
وان بقيته ماعرفت اقـول لـي جملـة مفيـده
الف مرة قبلـه اعـد القصيـده مـن لسانـي
ولعنبوه ان جيت عنده قمت اخربط بالقصيده !
امدحه وانا ادري انـه لـو تباطانـي نسانـي
انطحه وانا اعرفه مجنـون و أفكـاره عنيـده
من يسوي بس سواتك يالرهيـف الاسمرانـي
منهو من الناس غيرك غلطته ترفع رصيـده ؟!
من يقص جناح طيرك وانت اعز انسان جانـي
كيف اخاف رماح غيرك وانت طعناتك سديـده
إن تبعتك أتبعك مـن طيبـي وواسـع بطانـي
والا انا لا جيت اكيد انسان تدري كيف اكيـده
اقدر انزع ثوب طيبي والبـس ثيـاب الانانـي
واقدر اطلع من عذابي والعب بـدورك واجيـده
وان بغيت اكسب رهاني بأي وقت اكسب رهاني
واخدعك بإحساس كاذب واتحدى مـن يصيـده
ابك انا لاشفت خلي حط غيـري فـي مكانـي
والله اني لاتركه واصد واعشـق سيـد سيـده
خلني داخل حـدودك واجبـر بخاطـر زمانـي
إكذب فـباقي وعودك واصدق بلحظـة سعيـده
إنتشلني مـن بـرودك لـو تولـع بالمحانـي
عطني إحساس بوجودك واخذ كل اللـي تريـده
تكفى واليا قلت تكفى بيـع خلـق الله عشانـي
لا تضيع من يدينـي فرصـة العمـر الوحيـده
جيت مابيك تحقرني جيت ابيـك تعـز شانـي
جيت ابي فزعة ضلوعك من مشاعرك البليـده
يعلم الله شفت منـك ومـن غيابـك ماكفانـي
كان ماتقـدر تخفـف هـم قلبـي ... لاتزيـده
الرئيسية 
الإثنين أبريل 20, 2009 6:19 pm
